Il status da protecziun S na vegnia perquai betg abolì avant ils 4 da mars 2024, quai sche la situaziun na sa midia fin lura betg fundamentalmain. Uschia vul il Cussegl federal sclerir la situaziun per las persunas che tschertgan protecziun, ma er per ils chantuns, las vischnancas ed ils patruns, sco el ha communitgà la mesemna.
Prolungadas vegnan er las mesiras da sustegn specificas per persunas cun in status da protecziun S. La Confederaziun sa participescha cun 3'000 francs per persuna e per onn. Ultra da quai ha il Cussegl federal incumbensà ils chantuns d’adattar ils documents d’identitad per las persunas che tschertgan protecziun.
Il mars passà aveva il Cussegl federal activà per l'emprima giada il status da protecziun S per retschaiver persunas da l'Ucraina cun basegn da protecziun. Fin uss è il status vegnì concedì a passa 67'000 persunas.
