Svizra - È l’aua da baiver contaminada?

En Svizra po l'aua da baiver esser contaminada cun il tissi Tri-fluor-Acetat u curt: TFA. Quai mussan provas d'aua, che «SRF-Investigativ» ha fatg. TFA è ina substanza, che vegn duvrada en blers products, sco per exempel en medicaments, pesticids u en substanzas da sfradentar. Il problem cun la substanza saja, che quella na possia strusch vegnir filtrada ord l'aua, e che la concentraziun po en il futur anc s'augmentar. Tenor l'Uffizi federal d'ambient ha cumenzà in emprim studi davart TFA – suenter vegnia la situaziun evaluada danovamain.