Sco l'agricultura svizra era er l'agricultura grischuna confruntada cun diversas sfidas pervi da l'aura extrema durant il 2018. Setgira sin alps e tar ils ers giudim las vals, pauca verdura, ma bleras ivas – igl era turbulent.
Damain pavel e perquai dapli animals da maz
Tras la mancanza d’aua è creschì damain rasdiv e cun quai hai dà damain pavel. Ils purs han stuì vender dapli animals co prevesì ed ils pretschs per charn èn crudads en consequenza.
Per il Grischun aveva fatg il Plantahof tuttina in facit surprendent: La stagiun d'alp 2018 saja numnadamain stada ina buna stagiun. I dettia dentant grondas differenzas: Alps pli bassas han gì in grev temp – e singuls han gì da stgargiar pli baud. Alps pli ad aut hajan dentant pudì star pli ditg che uschiglio.
Pauca verdura, ma bun vin
Er ils producents da verdura hajan savì racoltar pli pauc ed hajan gì da sauar dapli. Auters per cunter hajan profità, resumescha la SDA: Uschia haja quai dà records tar primblas e maila.
Cun las ivas dal 2018 han er ils viticulturs grischuns savì producir in vin excellent – i sa tractia schizunt da la «racolta dal tschientaner», avevan ils experts grischuns sco Hans Jüstrich dal Plantahof atschertà.
Midada politica – da Schneider-Ammann a Parmelin
Politicamain era l'agricultura tema tar las trais iniziativas da fair-food, segirezza alimentara e vatgas cun cornas.
L'onn proxim vegn la Svizra a survegnir cun Guy Parmelin in nov minister agrar. Da ses antecessur Johann Schneider-Ammann vegn quel lura a surpigliar il tema politica agrara 22+, ch'è actualmain en consultaziun.
Qua chattais tut davart la setgira en il Grischun.
RR novitads 10:00+
