En Svizra datti bler dapli glisch ch'anc avant 20 onns – u en pleds tecnics «las emissiuns da glisch» sajan pli che sa dublegiadas ils ultims 20 onns, rapporta la SDA, citond in rapport dal Cussegl federal.
Quest plus da glisch è in minus per ils animals
Diversas examinaziuns scientificas vegnan a la conclusiun, che la surabundanza da glisch artifiziala è in grond privel, gea, schizunt in privel mortal per diversas spezias dad utschels ed insects.
Perquai hajan las emissiuns da glisch da vegnir restrenschidas – e quai per tant sco che la tecnica ed il manaschi possian far quai per ch'i saja economicamain anc supportabel.
Far quai che va gia uss – dentant betg dapli
Tuttina vegn il Cussegl federal en ses rapport a la conclusiun, ch'i na saja betg da midar las leschas per proteger la varietad da las spezias ed ils spazis da viver. Spezias e spazis sajan gia protegids suffizientamain tras las leschas actualas. Quai scriva il Cussegl federal e desista perquai da cumplettar l'ordinaziun davart la protecziun da natira e da la patria.
RR novitads 11:00