A partir da gievgia pon Svizzers e Svizras ch'èn en la Gronda Britannia u en l'Africa dal Sid sgular enavos en Svizra. Quai grazia ad ina regulaziun excepziunala dal Departament federal per natira, traffic, energia e communicaziun.
Dapi la dumengia èn tut ils sgols tranter la Svizra e la Gronda Britannia sco era l'Africa dal sid annulads per minimar la derasaziun dal coronavirus mutà.
Per che Svizzers pon tuttina vegnir a chasa sur ils dis da festa hajan ins elavurà ina schliaziun, communitgescha l'Uffizi federal per l'aviatica civila .
Il medem valia era per persunas ord la Gronda Britannia u l'Africa dal sid ch'èn en Svizra. Era lezzas duain avair la pussaivladad da sgular a chasa.
Per passagiers che sajan en quarantina valian mesiras da protecziun pli severas.