La Svizra è quest onn sin plazza 14 da la rangaziun da «reporters senza cunfins» ed uschia per l'emprima giada dapi sis onns betg pli sut ils megliers 10. A la testa da la classificaziun dals 180 pajais èn la Norvegia, il Danemarc e la Svezia.
Quest resultat na duai dentant betg vegnir surinterpretà, scriva l'organisaziun: Influenzà la rangaziun haja cunzunt ina midada da metoda. L'indicatur da l'economia da l'organisaziun mesiria oravant tut la diversitad da las medias.
Medemamain in'influenza hajan las discussiuns politicas en Svizra: Per l'ina existian largia en las leschas e per l'autra saja sa furmà en Svizra durant la pandemia da Covid-19 in clima ostil ed intimidont envers las medias - in'atmosfera che la Svizra n'haja fin là anc betg enconuschì en questa dimensiun.
Tschertgar soluziuns
Suenter il Na en la votaziun dals 13 da favrer cunter il pachet da medias dumonda l'organisaziun «reporter senza cunfins» Svizra en spezial las autoritads chantunalas da reprender il dossier e da promover soluziuns durablas per las medias per garantir la qualitad da las infurmaziuns per burgaisas e burgais.
Plinavant saja in fatg ch'i dettia adina dapli «mesiras preventivas» cunter las medias e che quellas vegnan era savens lubidas. Quai vul dir ch'i vegn empruvà d'evitar publicaziuns en las medias. Talas mesiras da metter si in buccarè a schurnalistas e schurnalists haja ina cumissiun dal Cussegl dals chantuns anc rinforzà il cumenzament da l'onn – in fauss signal.
Qua è la libertad da pressa garantida:
- Norvegia
- Danemarc
- Svezia
- Estonia
- Finlanda
- Irlanda
- Portugal
- Costa Rica
- Lituania
- Liechtenstein
In sguard sin ils vischins da la Svizra: La Germania è sin plazza 16, la Frantscha sin 26, l'Austria sin 31 e l'Italia sin rang 58.
