La Svizra laschia entrar e viagiar vinavant migrantas e migrants e quai a moda illegala. Ins laschia uschia simplamain passar fugitivs. Quai cuntrafetschia a la cunvegna da Schengen-Dublin. Questa renfatscha ha fatg in pledader dal ministeri tudestg per migraziun envers la NZZ am Sonntag.
Uss sa dosta la Cussegliera federala ch'è responsabla per fatgs d'asil, Karin Keller-Sutter. La Svizra ageschia confurm a la cunvegna. Sche las persunas na dumondan betg lur dretg d'asil, lura na possia ins betg tegnair quels en Svizra.
Persunas dal fatg n'èn betg perina
La professura per dretg da migraziun Sarah Progin-Theuerkauf di ch'i saja ina clera cuntravenziun a la cunvegna. Tenor Schengen-Dublin èsi da cumenzar il process d'asil en il pajais, en il qual la persuna è entrada sco emprim. Alberto Achermann, medemamain professur per dretg da migraziun di il cuntrari. El ha ditg envers la NZZ am Sonntag che Schengen-Dublin valia pir, cura che la persuna fa lur dumonda per asil l'emprima giada.
Il secretariat statal da migraziun ha constatà l'october che var il dubel da persunas arriva il mument en Svizra. Tar la staziun da viafier a Buchs sajan per part bunamain 1'000 persunas arrivadas per di, e la SBB aveva tramess quellas vinavant a Basilea, sco SRF Rundschau ha rapportà.
