L'emna passada ha il Tribunal federal decis che la banca gronda UBS stoppia surdar datas da clients a la Frantscha. La decisiun è crudada cun 3 cunter duas vuschs e la vusch da Donzallaz è stada la vusch decisiva. Donzallaz ha sustegnì da dar ora las datas, era sche blers parlamentaris eran encunter.
La PPS crititgescha Yves Donzallaz dad avair agì cunter l'interess da la partida. Il schef da fracziun da la PPS, Thomas Aeschi ha er ditg, ch'ins stoppia ponderar sche la PPS veglia reeleger derschaders federals da l'atgna partida sche quels na represchentian tuttavia betg las ideas da la partida.
Derschader sto decider independent
Per Giusep Nay e Thomas Stadelmann èsi però cler: in derschader sto agir independent dals interess da la partida per pudair garantir la separaziun da las pussanzas e l'independenza dals derschaders. Partidas n’hajan nagin dretg che derschaders decidan tenor lur avis, ha ditg Nay en l’emissiun «rendez-vous» da Radio SRF.
RR novitads 15:00