Il turissem en Svizra sa revegn be plaunsieu da la pandemia da corona. L’onn passa haja l’hotellaria nudà bunamain 30 milliuns pernottaziuns. Da quai sajan 21 milliuns stads giasts indigens – in nov record. Auter èsi tar ils osps da l’Europa. Qua hajan ins nudà mo mez uschè bleras pernottaziuns l’onn passà sco anc il 2019. Martin Nydegger, il directur da Svizra Turissem è dentant plain fidanza che quest dumber vegn a crescher.
Probabel gia quest’onn ni il 2023 vegnin nus tar ils osps da l’Europa a cuntanscher il dumber da las pernottaziuns d’avant la pandemia.
Anc dapli pazienza stoppian ins avair cun ils martgads lontans sco la China. Il pli baud il 2025 quinta Svizra Turissem che las pernottaziuns cuntanschian puspè il nivel d’avant la crisa da corona.
Guerra pudess ralentar svilup
In stritg tras tuttas prognosas pudess dentant la guerra en l’Ucraina far. Ina novitad schoccanta che mettia en la sumbriva tut ils quitads pervia da pernottaziuns e osps, di Nydegger.
Il 2019 ha la Svizra nudà circa 360'000 pernottaziuns da osps russ. Quels pudessan ussa dar davent. Vitiers vegnia la malsegirtad che la guerra chaschunia, cunzunt tar osps dal lontan. Quels na possian betg giuditgar la situaziun da segirtad. I saja perquai impurtant da communitgar fitg bain che la Svizra na saja betg direct pertutgada da la guerra e che vacanzas en noss pajais sajan segiras.
La branscha da turissem haja adina puspè mussà ch'ella possia magunar talas fridas ed el saja persvas che quai vegnia era questa giada ad esser il cas, di Martin Nydegger.
