Il concern d’assicuranzas «Swiss Life» ha incassà ils emprims trais quartals da l’onn 2022 dapli taxas che durant la medema perioda da l’onn passà. Dal schaner fin il settember haja Swiss Life incassà cun cussegliaziuns da finanzas, l’administraziun da la facultad per cassas da pensiun ubain la vendita da products per la vegliadetgna liads a fonds 1,75 milliardas francs – in plus da 7%. Quai ha communitgà l’assicurader da vita cun sedia a Turitg.
Las entradas da premias èn stadas pli u main stabilas tar 15 milliardas francs (-1%). En valutas localas èn las premias per part creschidas per 2%. Quai correspunda a quai ch'ils analists avevan spetgà. Davart il gudogn na fa il concern naginas indicaziuns suenter trais quartals.
