Il schef da la societad aviatica Swiss – Dieter Vranckx – è sa defendì cunter las renfatschas, che la Swiss pratitgeschia dumping da pajas. Quai en connex cun l'annunzia da la Swiss, da vulair sa gidar cun persunal ed aviuns da la societad aviatica lettona Air Baltic per ina part da lur sgols. Cun ina chauma dal persunal da la societad aviatica na quinta Vranckx betg. La collavuraziun cun la Air Baltic saja necessaria, perquai che la Swiss ha stuì stritgar plirs sgols pervi da la mancanza da persunal.
Sindicats protestan cunter l'engaschi da l'Air Baltic
Plirs sindicats han renfatschà a la Swiss da far dumping da paja. Els protestan en ina brev a la direcziun encunter l’engaschi d’eroplans e squadras da l’Air Baltic. Tar il plan da sgol da l'enviern duai la societad aviatica da la Lettonia gestiunar fin sis aviuns sin incumbensa da la Swiss. Suenter ch’il persunal haja prestà sia cumpart durant la crisa, vegnian plazzas da lavur uss transferidas en l’exteriur.
Swiss duai meglierar las cundiziuns d'engaschament
Durant ils mais passads han ils partenaris socials discutà diversas giadas per meglierar la situaziun. La Swiss haja prendì memia tard mesiras tar il persunal per evitar stretgas en la producziun. Che la Swiss haja uss fatg contracts cun la societad aviatica da la Lettonia senza laschar savair insatge, donnegeschia quella collavuraziun dals e cun ils partenaris socials. Ils sindicats giavischan che la societad aviatica megliereschia las cundiziuns d’engaschament e revedia sia decisiun davart ils contracts cun la Air Baltic. La Swiss n’ha fin uss betg reagì sin las renfatschas.
