Tgi ch'entra il bajetg da sanadad e fatgs socials en la Gäuggelistrasse 7 a Cuira manegia a prima vista ch'el saja en l'ospital. E propi: material, utensils gea schizunt ils letgs èn ils medems sco en il vair mintgadi da tgira. Però igl è in champ da trenament. Ed amez quel: Sara Bisculm da Domat. La giuvna da 19 onns ha terminà dacurt ses emprendissadi a l'Ospital chantunal dal Grischun e represchenta il chantun Grischun als Swiss Skills en la categoria spezialista da sanadad (FaGe).
Ensemen cun Ursina Wiedmer dal Partenz, che lavura a l'Ospital da Tavau, è ella ina da las duas represchentantas grischunas en quest champ professiunal. Avant ch'i vegn serius a Berna, spetga anc in ultim test: ina simulaziun manaivla a la realitad – inclusiv statists e situaziuns da stress.
Fracturas da l'ossa ed emoziuns realas
Las statistas ed ils statists voluntaris èn vegnids incumbensads da l'uniun samaritana da Cuira. Ruth Heierli gioga ina pazienta dad 80 onns che ha rut ina spatla. Kevin Mike Honegger gioga in giuven ballapedist ch'ha ina ruttadira da la stgaina. Durant var duas uras ha Sara Bisculm stuì mussar, tge ch’ella sa.
Impressiuns dal trenament
-
Bild 1 von 4. Perfin ils letgs èn ils medems sco en l'ospital. Bildquelle: RTR.
-
Bild 2 von 4. Divers material è pront per la prova generala. Bildquelle: RTR.
-
Bild 3 von 4. Ina dunna da prest 80 onns ha mal il bratsch e Sara Bisculm mussa tge ch'ella sa. Bildquelle: RTR.
-
Bild 4 von 4. Il giuven ballapedist ha rut ina chomma. Bildquelle: RTR.
Sara Bisculm pareva ruassaivla, concentrada e suverana. Bain ha ella ina giada laschà crudar ina stgatla da medicaments per terra. Però ha ella prendì cun umor quella situaziun.
En la vita professiunala capita quai era. Jau pens ch'jau hai reagì bain.
Tar il pazient Noah Meyer ha il tema ballape procurà spert per in cumenzament schluccà. Er ina buna communicaziun è in criteri da valitaziun impurtant tar ils Swiss Skills.
L'experta: «Ella è absolutamain pronta»
Lucia Barone, ina da las expertas, giuditgescha las prestaziuns da la giuvna tgirunza. Ses facit: «Sara ha dumagnà quai fitg bain. Ella è absolutamain fitta per ils Swiss Skills.» Quai vesa era Sara Bisculm uschia – conscienta e cun ina tscherta ambiziun guarda ella vers la concurrenza. «Perder sgrattass bain in zic vi da l'ego», di ella cun in tschegn d'egl.