Siglir tar il cuntegn

Header

cuntegn

Taglia minimala da l'OECD Cussegl naziunal vul tuttina be 25% per la Confederaziun

Concerns multinaziunals han davent dal 2024 da pajar 15% taglia en tut ils pajais da l'OECD ed uschia er en la Svizra. Cun quai spetgan entradas supplementaras da blers concerns multinaziunals ch'han lur domicils qua. Sco che quellas entradas duain vegnir scumpartida è vegnì discutà en las dus chombras dal parlament.

Taglia minimala globala da l'OECD

Avrir la box Serrar la box

137 pajais èn da la partida tar la refurma: interpresas multinaziunalas cun ina svieuta sur 750 milliuns euros ston pajar ina taglia minimala da 15%. Sch'in pajais lascha pajar pli pauc che 15% pon tschels pajais reclamar il rest dals 15% taglia da las interpresas.

La refurma è in project da l'OECD ed ils G20. L'OECD cumpiglia tut ils grond pajais dal Vest. Ils G20 cumpiglian ils 20 pli gronds pajais industrialisads.

Il Cussegl dals chantuns è restà glindesdi sin ina cumpart federala dad in quart, pia trais quarts da las entradas per ils chantuns. La decisiun è stada clera cun 31 cunter 11 vuschs, tar ina abstenziun.

Cussegl naziunal mida idea

Oriundamain vuleva il Cussegl naziunal il dubel, vul dir che 50% da la taglia giessan als chantuns e 50% a la Confederaziun. Las aderentas ed ils aderents da questa soluziun han argumentà che la differenza tranter ils chantuns cun taglia auta e chantuns cun taglia bassa na duaja betg vegnir pli gronda.

Mardi ha el dentant tuttina vuschà per la proposta dal Cussegl dals chantuns. Cun quai duain definitivamain ir be in quart da las entradas a la Confederaziun. Cun 99 cunter 88 vusch è il resultat stà stgars.

audio
Per tadlar: curt e cumpact
ord RTR Audio dals 02.12.2022.
laschar ir. Durada: 54 Secundas.

RTR novitads 18:00

Artitgels legids il pli savens

Scrollar a sanestra Scrollar a dretga