Suenter la Chombra pitschna ha oz era il Cussegl naziunal approvà la moziun dal cusseglier dals stans Erich Ettlin (PCD/Sursilvania), quai cun 112 cunter 70 vuschs ed ina abstenziun. Il Cussegl federal, ch’era cunter la moziun, sto ussa elavurar ina proposta per midar la lescha correspundenta.
La maioritad dal Parlament federal è pia da l'opiniun ch’i duai en il futur esser pussaivel da pajar suenter las contribuziuns, sch'ins n’ha betg mintg'onn pudì pajar la summa maximala da 6’826 francs en la 3. pitga. Quai n’è oz betg pussaivel.
I dat dentant limitas. Pajar suenter pon ins mo mintga tschintg onns. E lura era mo maximalmain la summa ch'ina persuna senza cassa da pensiun dastga pajar en in onn ella 3. pitga. Quest onn èn quai 34’128 francs.
Classa mesauna profitescha
Las rentas ord la cassa da pensiun vegnan adina pli pitschnas, argumentescha Ettlin. Ensemen cun la renta d'AVS na tanschan ellas en futur betg pli per garantir il standard da viver, sco quai ch'el è definì en la Constituziun federala.
L'idea dad Ettlin, ch'è dal reminent cussegliader da taglia, è da cumpensar quai cun rinforzar la 3. pitga. Da quai profiteschian en emprima lingia la classa mesauna, di el. Per exempel persunas che han en giuvens onns gudagnà pli pauc, per exempel pervia da scolaziun u lavur parziala. Ubain era mammas che han reducì lur pensum da lavur. Els ed ellas pon pli tard, cura ch'els gudognan meglier emplenir quellas largias en la 3. pitga ed uschia meglierar lur situaziun, cura ch'els vegnan pensiunads.
Bainstants pon optimar las taglias
L’Uffizi federal da statistica mussa dentant che mo in terz da quellas persunas che possedan insumma in conto da prevenziun da la 3. pitga pon era pajar en la summa maximala. Perquai profiteschian en emprima lingia las persunas bainstantas da la midada, argumenteschan ils adversaris da la moziun.
Era per pudair pajar suenter las contribuziuns dovr’ins avunda entradas. E quellas persunas possedian en general era gia ina buna cassa da pensiun.
Ultra da quai vegnia uschia creà ina nova pussaivladad da spargnar taglia. La moziun prevesa numnadamain da pudair trair giu sper la contribuziun annuala normala era gist anc la summa ch'ins paja suenter da las taglias. E pli blera taglia ch'ina persuna u in pèr paja e pli grond è era l'effect da spargn, crititgeschan ils adversaris. E quels daners manchian lura en la cassa da vischnancas, chantuns e la Confederaziun.
Erich Ettlin na lascha dentant betg valair quels arguments e di che las persunas bainstantas che hajan adina pajà en il maximum pussaivel en la 3. pitga, na possian betg profitar da la midada ed el craja che las perditas da taglia sajan limitadas e survesaivlas.
