Siglir tar il cuntegn

Header

cuntegn

Terza unda Parmelin: «Restaurants restan serrads»

Il president da la Confederaziun Guy Parmelin na fa betg grondas speranzas che las mesiras da corona vegnian proximamain schluccadas pli fitg. Pervi dal svilup da la pandemia en l’exteriur dettia per la Svizra be paucas opziuns, ha ditg Parmelin en in’intervista cun la «SonntagsZeitung».

Vinavant avair pazienza e restar ruassaivel

Da schluccar las reglas per inscunters privats haja il Cussegl federal fatg in pass. Per puspè ir en restaurants u visitar occurrenzas dovria la Svizra anc pazienza. Dentant chapeschia el la frustraziun dal pievel en quest connex. Tuttina speria el che la populaziun restia ruassaivla. El haja bregia ch’il tun vegnia adina pli rauc. Er condemneschia las escalaziuns da la violenza sco a Son Gagl cun vehemenza.

Speranza sin la stad

Il president da la Confederaziun appellescha a la disciplina. I saja vinavant da sperar che la situaziun sa stabiliseschia grazia al program da vaccinar e ch’i pudess cun quai puspè dar la stad ina tscherta normalitad, uschia Parmelin.

Evaluar proposta

Er saja la proposta che mo persunas testadas negativ sin il coronavirus possian visitar occurrenzas pli grondas, ina pussaivladad interessanta. Il Cussegl federal duaja examinar questa proposta per in proxim pass da schluccada, uschia Parmelin.

Dapli cooperaziun sin il continent

Ultra da quai pledescha el per dapli cooperaziun en l’Europa. Ensemen cun ses collegas d’uffizi Bruno Le Maire en Frantscha e Peter Altmaier en Germania haja el discutà davart l’idea d’ina collavuraziun pli stretga. Per exempel pudess la Svizra gidar da construir in’industria da vaccinar en l’Europa. Almain haja la Svizra bunas premissas da giugar ina rolla impurtanta en quest connex. I dovria martgads averts e coordinaziun en l’Europa.

Ord l'archiv

video
Bilantscha dals cravals a Son Gagl
Or da Tagesschau dals 03.04.2021.
laschar ir. Durada: 1 minuta 50 Secundas.

RTR novitads 08:00

Artitgels legids il pli savens