Siglir tar il cuntegn

Header

cuntegn

Tests da vendita d'alcohol Memia blers giuvenils pon cumprar illegalmain alcohol

En ustarias e bars na vegn betg adina sa tegnì vid las reglas per la protecziun dals giuvenils. Adina puspè pon giuvenils minorens cumprar illegalmain alcohol. Cun tests da vendita, scolaziun e material d'infurmaziun vul l'Uffizi da sanadad chantunal schliar quest problem.

La vischnanca da Glion ha fatg tests da vendita d'alcohol en 15 da sias ustarias e bars. Ensemen cun ina persuna dal fatg han plirs giuvenils tranter 16 e 18 onns empustà diversas spirituosas.

audio
Cumpra dad alcohol tar giuvenils
aus Actualitad vom 07.04.2022.
abspielen. Laufzeit 3 minutas 11 Sekunden.

Bain reducì da 76% sin 64% – però betg avunda

L'emprima giada, avant dus onns, han 76% da las ustarias vendì illegalmain alcohol als giuvenils. Sco ch'il manader da la chanzlia da Glion Michael Spescha di, haja la vischnanca lura fatg attent ils manaschis e giavischà ch'els vegnan anc ina giada controllà in onn pli tard. In onn pli tard lura, il november 2021, è la quota da vendita a giuvenils ida enavos – sin 64%. Tuttina saja ella anc adina memia auta, di Michael Spescha.

Nus vegnin ad organisar ensemen cun l'Uffizi da sanadad dal Grischun ina scolaziun per tut ils manaschis d'ustaria en l'intschess da Glion.
Autur: Michael Spescha chanzlist da la vischnanca da Glion

Quella scolaziun na saja betg obligatorica. Sche la quota restia dentant vinavant uschè auta, hajan ins la pussaivladad da sancziunar e sco davosa via era retrair la lubientscha d'ustaria, di Michael Spescha.

Betg mo in problem local – mabain in grischun

La problematica che giuvenils minorens pon retrair alcohol en bars ed ustarias n'è dentant betg mo in problem da la vischnanca da Glion. Era il rest dal Grischun saja pertutgà, di Antonia Bundi da l'Uffizi da sanadad chantunal. Ils davos dus onns saja la situaziun schizunt sa pegiurada en il Grischun. Ina raschun sajan las restricziuns en connex cun corona.

La glieud ha stuì purtar mascrina, ed uschia èsi stà pli grev per il persunal da service da schazegiar la vegliadetgna.
Autur: Antonia Bundi coordinatura per prevenziun da dependenzas tar il chantun

L'onn 2019 han ins fatg 135 tests da vendita en il Grischun. En 35% dals cas han ils giuvenils acquistà bavrondas alcoholicas. L'onn passà han ins fatg be 62 tests ed en 56% dals cas han ils giuvenils acquistà illegalmain alcohol.

Las cifras naziunalas èn meglras

Tuttina datti era blers lieus, nua ch'i funcziuna correctamain. Quai mussan las cifras dals tests da vendita d'alcohol da l'entira Svizra. Fertant ch'igl è vegnì vendì en il Grischun l'onn 2020 a dapli che mintga segund giuvenil illegalmain alcohol, èsi stà en l'entira Svizra be a mintga terz.

Antonia Bundi declera quai uschia ch'il Grischun è in chantun turistic, nua ch'i dat savens midadas da persunal da service. Uschia saja era pli grev da scolar ellas ed els. Ina buna scolaziun e far regularmain tests da vendita d'alcohol saja ina buna via per evitar ch'ils giuvenils consumeschian alcohol en ustarias e bars.

RTR actualitad 07:00

Artitgels legids il pli savens

Scrollar a sanestra Scrollar a dretga