Il numer d'agid da intoxicaziuns svizzer 145 è vegnì clamà l'onn 2025 uschè savens sco anc mai. Totalmain ha l'uniun Tox Info Suisse fatg 44'736 cussegliaziuns pervi da intoxicaziuns.
En general constatain nus ina malsegirezza generala. Forsa pervi d'infurmaziuns che la glieud chatta en l'internet. Instruments sco ChatGPT u l'intelligenza artifiziala rinforzan, tenor nossa experientscha, la malsegirezza dapli che ch'els gidan.
Quai è in augment da 4,6% congualà cun l'onn 2024, communitgescha Tox Info Suisse en ina communicaziun da medias.
Var 40% da tut las cussegliaziuns pertutgan uffants en la vegliadetgna prescolara. Quai èn però bunamain adina stads accidents, per exempel sch'in uffant ha traguttì medicaments u products da nettegiar senza vulair.
Era giuvenils èn stads pertutgads. Els han fatg ora 6% da las dumondas. Tar els eran en il center intoxicaziuns intenziunadas, sco che Tox Info Suisse scriva.
Sco gia ils onns precedents ha dà il pli savens intoxicaziuns cun medicaments u products da tegnairchasa. La gronda part dals telefons eran da la populaziun. Var 30% da las dumondas èn vegnidas fatgas da persunas spezialisadas d'ospitals, da praticas da medis u dals servetschs da salvament.
Il clom d'agid da Tox Info Suisse è cuntanschibel 24 uras durant 365 dis.