En il traffic public datti bainprest ina schliaziun per il bigliet d'uffants e giuvenils che accumpognan ina persuna creschida. A partir dal december duai esser pussaivel che creschids pon chargiar il bigliet da juniors ed uffants sin lur conto da Swisspass. Fin ch'i dat la versiun digitala per quai cusseglia la «Alliance Swisspass» da chargiar giu la «SBB-Preview-App» u in'autra app da traffic public e da deponer là il Swisspass per uffants.
Questa schliaziun è vegnida fatga suenter la critica dals creschids. Dapi dacurt è la carta da juniors numnadamain be pli sin in Swisspass per uffants e l'uffant saja sez responsabel da prender cun quella. I è vegnì crititgà che surtut ils pli giuvens na pensian betg adina vidlonder da prender cun quella e che la responsabladad na duaja betg esser tar ils uffants.
