Ils edifizis da l'ovra nucleara Mühleberg, ch'è vegnida serrada en il chantun Berna, pudessan restar. Quai resulta d'ina decisiun dal Tribunal administrativ federal. Uschia na sto l'ovra nucleara betg vegnir demolida dal tuttafatg, sch'i n'exista nagin privel radiologic pli. La raschun è in recurs da la gestiunaria, la BKW. Ella argumentescha ch'ina anteriura ovra atomara na saja betg pli suttamessa a la lescha d'energia nucleara, sch'i na dat nagin privel radiologic pli.
Il Tribunal administrativ federal ha dà raschun a la BKW. Sco exempel numna il Tribunal administrativ federal l'anteriur implant experimental a Lucens en il chantun Vad. Il terren cun ils bajetgs sur e sutterrans, n'è betg pli suttamess a la lescha d'energia nucleara, mabain al dretg da construcziun chantunal. Il chantun Vad nizzegia quests bajetgs sco magasin per bains culturals ed archeologics.
Contribuziuns al fond ston vegnir adattadas
Tras quella decisiun ston la contribiziuns al fond per la serrada d'ovras atomaras vegnir recalculadas per ils onns 2017 fin 2021. L'ovra atomara Mühleberg na producescha dapi radund trais onns nagina electricitad pli. Per giuditgar ils custs per la serrada d'ina tala ovra, sto uss vegnir sclerì quant gronda che la probabilitad è, ch'ins po er nizzegiar vinavant ils bajetgs.
La BKW ha er numnà anc ina rotscha auters puncts. Il Tribunal administrativ federal ha dentant refusà quels en ses rapport da passa 60 paginas.
