Sin basa da la lescha federala davart il provediment economic dal pajais ha il Cussegl federal decis l'atun 2022, da realisar la reserva d'enviern d'energia cun l'ovra da gas a Birr. Per il Cussegl federal è il ristg stà fitg grond ch'ins na possia betg importar avunda energia durant l'enviern 2022/2023.
Sin intervenziun dad in'abitanta or da la regiun ha il Tribunal administrativ federal examinà il cas e scriva – ch'il Departament federal d'energia n'haja betg pudì mussar sin basa da tge datas ch'il Cussegl federal è vegnì a la conclusiun ch'ins stoppia spetgar ina gronda mancanza d'energia. Quai saja dentant la premissa da dastgar decider uschè grondas mesiras sco in'ovra da reserva. Uschia ha mancà la basa legala per pudair bajegiar e prender en funcziun l'ovra da gas.
Il Cussegl federal dastgia bain prender decisiuns per segirar il provediment d'energia, era cun intervenziuns economicas, dentant na saja la regenza betg libra – las mesiras stoppian sa drizzar tenor la lescha ed ils princips da la Constituziun federala. Las mesiras stoppian star en proporziun cun la crisa. Plinavant stoppian ins valitar tge influenza che la mesira haja sin il conturn. En quest cas na saja betg cler tge autras opziuns ch'il Cussegl federal haja tratg en consideraziun – tranter auter cun prender resguard sin l'effect per l'ambient.
La sentenzia è definitiva e na po betg vegnir tratga vinavant.
Il moviment Chauma dal clima Svizra beneventa la sentenzia dal Tribunal administrativ federal, e pretenda consequenzas. L'ovra da reserva a Birr saja d'allontanar immediat, damai che la premissa per l'existenza da quella manchia, communitgescha il moviment. Vitiers na duain las ovras a Cornaux (Neuchâtel) e Monthey (Vallais) betg pli restar sco reserva sut contract da la Confederaziun.
