Siglir tar il cuntegn

Header

cuntegn

Tribunal federal penal Blatter e Platini nunculpants

Sepp Blatter e Michel Platini n'èn betg culpants. A questa conclusiun vegn il Tribunal federal penal a Bellinzona. Els vegnan acquittads da la renfatscha d'engion. En connex cun la renfatscha da gestiun malfidaivla è il cas vegnì sistì.

La dretgira ha plinavant concedì a Sepp Blatter ina summa da reparaziun da 20'000 francs. Platini ha desistì d'ina tala. El survegn plinavant er puspè access als radund 2 milliuns francs che la procura publica federala aveva bloccà.

Sco quai ch'il dispositiv dal tribunal mussa, muntan ils custs dal process a 130'000 francs. Perquai ch'ils dus umens èn nunculpants, van quels daners sin donn e cust da la cassa dal stadi. Blatter survegn ultra da quai radund 80'000 francs per indemnisar sia defensiun. Platini survegn 140'00 francs per gliez. Er questas summas ha la cassa dal stadi da pajar.

In dubio pro reo

Il Tribunal federal penal parta dal fatg ch'igl è stà endretg da cumenzar la procedura encunter Sepp Blatter e pli tard Michel Platini. Dentant haja la dretgira da suandar il principi ch'igl è en cas da dubi da decider a favur da l'accusà. La dretgira è vegnida a la conclusiun che Platini haja senz'auter pudì survegnir in milliun ad onn, perquai ch'el era enconuschent e perquai che tals honorars eran en il ballape usitads. Ch'i haja dà sco contract en scrit be quel dal 1999 cun ina summa da 300'000 francs, na saja betg probabel, ha declerà la derschadra.

Quai avess muntà che Platini avess lavurà l'emprim onn senza in contract da pajament per Blatter. I saja dentant plausibel che quest contract saja be vegnì fatg per che la Fifa possia insumma pajar ina paja. Quest contract na saja dentant betg stà serrà, perquai che la Fifa haja da quest temp gnanc pudì pajar dapli, perquai ch'ella ha gì problems da liquiditad. Plinavant vesa la dretgira er sco plausibel che Platini ha pretendì ils daners pli tard, suenter ch'el ha udì tge summas ch'auters funcziunaris da la Fifa hajan survegnì cun lur abdicaziun. Qua haja Platini sbaglià la summa, damai ch'el haja supponì ch'el haja gia survegnì quatter giadas mintgamai 500'000 francs.

Platini: «Nus vegnin a sa vesair»

Michel Platini è cuntent ch'il cas saja uss passà, suenter set onns manzegnas e manipulaziun saja uss suandada la gistadad. Suenter la sentenzia a Bellinzona vul Michel Platini cumbatter vinavant. I dettia culpants che na sajan betg cumparids en quest cas. El garanteschia ch'ins vegnia puspè a sa vesair.

En quest cas orribel datti culpants che n'èn betg cumparids en quest process. Jau garantesch a vus: Nus vegnin a sa vesair.
Autur: Michel Platini Anteriur schef da la UEFA

Ses advocat ha dà vinavant quest statement da Platini. El na vegnia betg a laschar luc ed ir vinavant questa via per chattar la vardad enfin la fin, è vegnì cità l'um da 67 onns.

Per quai èsi ì

Avrir la box Serrar la box

En il process èsi i per dus milliuns francs – tant duai l'anteriur president da la Federaziun internaziunala da ballape (FIFA) Sepp Blatter avair pajà a Michel Platini, l'anteriur schef da l'Uniun da las Associaziuns europeicas da ballape (UEFA) – e cunquai avair facilità che Platini s'enritgescha.

audio
Per tadlar curt e cumpact
ord RTR Audio dals 08.07.2022.
laschar ir. Durada: 1 minuta 6 Secundas.

Quai ha pretendì il defensur

Tar il process da la FIFA al Tribunal federal penal a Bellinzona ha il defensur da l’anteriur president da la FIFA, Sepp Blatter, pretendì ina sentenzia senza chasti per ses mandant. La basa per il pajament da 2 milliuns a Michel Platini ch'è era stà accusà saja stada ina cunvegna a bucca. Ed i na dettia nagin motiv per la Fifa da pajar simplamain uschia 2 milliuns francs a Platini, di ses defensur vinavant. La valur da sia lavur sco cussegliader sin basa da sia carriera saja stada 1 milliun francs per onn. Pervia da motivs finanzials da la Fifa, era fatg giu per scrit 300'000 francs per onn. Blatter haja dentant fatg giu a bucca cun Platini ch'el survegn il rest anc pli tard.

Procura publica ha vulì chasti cundiziunà per omadus

En il process cunter l'anteriur president da la Fifa Joseph Blatter e l'anteriur president da la UEFA Michel Platini ha pretendì la Procura publica federala in chasti cundiziunà che privescha da la libertad dad 1 onn ed 8 mais. Platini avess ultra da quai anc duì far in pajament da cumpensaziun da radund 2,2 milliuns francs. Il process al Tribunal federal penal ha cumenzà la fin zercladur – Blatter e Platini han tranter auter stuì sa giustifitgar pervia da renfatschas d'engion.

Ils accusads han adina snegà

La Procura publica federala è stada da l'avis che Blatter haja agì a moda maliziusa. Il directur da finanzas ch'era suttamess ad el n'haja betg pudì supponer fraud, cura ch'el haja pajà or la summa a Platini. Ils dus accusads han adina snegà las renfatschas. Joseph Blatter aveva gia avant il process prendì posiziun en scrit:

Jau guard optimisticamain sin la procedura davant il Tribunal federal penal a Bellinzona.
Autur: Sepp Blatter

Il defensur da Platini, Dominic Nellen, ha discurrì da sia vart d'in proceder motivà politic. Ins haja vulì impedir che Platini vegnia elegì sco president da la FIFA.

RTR novitads 09:00

Artitgels legids il pli savens

Scrollar a sanestra Scrollar a dretga