Uschia na duain ils augments dals custs generals betg pli vegnir adossads pauschal als locataris. Nov duai esser obligatoric da cumprovar la dimensiun effectiva dals custs. Vitiers vul il Cussegl federal agiuntar dapli infurmaziuns sin il formular per annunziar il tschains inizial per l’abitaziun. Da nov duai quel era mussar il davos stan ed il stan actual dal tschains da referenza e da la chareschia.
Sch’i va per contestar augments
In’ulteriura proposta dal Cussegl federal è da lubir novs criteris da custs absoluts – sch’insatgi vul contestar augments dals tschains per l’abitaziun. Exempels èn in profit exagerà, u l’autezza dal tschains cumpareglià cun quels usitads en il lieu u en il quartier. Il formular per annunziar in augment dal tschains duai cuntegnair in avis correspundent.
Il davos punct proponì dal Cussegl federal è da reducir la quota per la cumpensaziun da la chareschia sin l’agen chapital, da fin uss 40% sin 28%.
Tschains 15% pli auts
Il Cussegl federal spetga, tut tenor il svilup futur dals tschains e da la chareschia – ch’ils tschains per l’abitaziun pudessan crescher fin il 2026 per fin a 15%. Il pachet cun las mesiras a curta vista uss preschentà, aveva el annunzià il november passà. La consultaziun per tut las ordinaziuns dal pachet dura fin ils 11 da fanadur.
SRF ha infurmà la fin da mars: