Il segund quartal da quest onn ha la parahotellaria svizra pudì nudar en tut 1,2 milliuns pernottaziuns. Quai annunzia l’Uffizi federal da statistica. Cumpareglià cun il medem temp da l’onn passà, èn quai bunamain dus terzs pli paucas pernottaziuns. L’avrigl fin il zercladur 2019 avevi dà 3,2 milliuns pernottaziuns en la parahotellaria.
Tant las abitaziuns da vacanzas, sco era las plazzas da campar han scrit var 50 pertschient pli paucas pernottaziuns – en congual cun l'onn passà. Tar il punct culminant da las restricziuns ha quai perfin dà in minus da 68 pertschient.
Ils esters han mancà
Il motiv per la diminuziun èn cunzunt stadas las restricziuns da viadi durant il lockdown. Uschia han mancà ils giasts da l’ester.
Avant in onn avevan ils giasts dad auters pajais procurà da l'avrigl fin il zercladur per 1 milliun pernottaziuns. Quest onn èn quai stadas durant il medem temp mo anc 100'000 pernottaziuns.
Profità ha la parahotellaria dals indigens. Svizras e Svizzers han fatg 1,1 milliun pernottaziuns en la parahotellaria durant il segund quartal. Quai è la mesadad dal nivel da l’onn passà, sco l’Uffizi federal da statistica scriva.
