Siglir tar il cuntegn

Header

cuntegn

Turissem svizzer Enviern profitabel va a la fin

L'enviern ha rendì quest onn or da vista turistica. Grazia a la blera naiv l'entschatta da l'enviern e las chombras plainas sur ils dis da Nadal, haja la gronda part da las destinaziuns nudà in bun enviern. Quai scriva Svizra Turissem suenter in'enquista tar las destinaziuns d'enviern.

Er en il Grischun haja i cumenzà fitg bun. Malgrà schlett'aura ed autas temperaturas cunzunt durant ils dis da Pasca hai dà 8,4% dapli entradas en il Grischun il mars 2024, cumpareglià cun l'onn passà. Quai scriva l'organisaziun da branscha Pendicularas grischunas en ina communicaziun a las medias.

Ch'igl haja dà bler entradas durant ils paucs dis cun bell'aura mussia, ch'i dettia ina dumonda era durant la primavaira. En tut sajan las Pendicularas grischunas cuntentas cun la stagiun. Igl haja dà in bun ton dapli visitadras e visitaders, cumpareglià cun onns passads.

Hotellaria

L'hotellaria haja quest enviern betg mo gì dapli pernottaziuns, mabain er fadià dapli daners cun las pernottaziuns. Quai ha ditg Wyrsch envers il schurnal regiunal da SRF.

Nus essan cuntents fin fitg cuntents cun la stagiun d'enviern.
Autur: Ernst Wyrsch Schef da Hotellerie Suisse Grischun
audio
Buna bilantscha da l'enviern per la hotellaria
ord Actualitad dals 02.04.2024. Maletg: Keystone
laschar ir. Durada: 2 minutas 49 Secundas.

Buna bilantscha en Svizra

En blers lieus svizzers surpassa l'enviern era l'onn 2022/2023 ch'è era stà bun per il turissem, scriva Svizra Turissem. Sulettamain schlett'aura durant il favrer ed il cumenzament dal mars haja fatg in pau mendra la bilantscha. E la chalira haja procurà per popularitad da purschidas alternativas a las pistas ed il sport d'enviern en regiuns pli bassas. Per la bilantscha ha Svizra Turissem dumandà regiuns da skis, sco era destinaziuns urbanas. Per la stagiun d'enviern èn tradiziunalmain giasts svizzers e giasts europeics ils pli impurtants, la Svizra saja dentant era populara tar visitaders e visitadras americanas.

RTR novitads 14:00

Artitgels legids il pli savens