Turitg - Terz cas da la virola da schimgias en Svizra

Sintoms, tractament, vaccin?

Hai jau la virola da schimgias? Co vegn ella tractada? È la virola cumparegliabla cun corona? Qua las dumondas e respostas principalas:

Tge èn ils sintoms?
L’emprim sentan ins sintoms sco tar la grippa: fevra, mal il chau, mal las giugadiras, mal il dies. Plinavant èn ins stanchel ed i po dar ch’ils nufs limfatics unflan. Tipic è ch’i dat era brumbels – l’emprim en fatscha e lura sin l’entir corp.

Davent da l’infecziun fin che la malsogna rumpa ora passan 6-16 dis. Cumpareglià cun corona èsi in decurs plitost miaivel.

Co s’infecteschan ins?
Cumpareglià cun corona s’infecteschan ins betg uschè svelt. Per survegnir la virola da schimgias dovri in stretg contact cun ina persuna infectada – per exempel ch’ins tutga en in brumbel, ha contact cun saun u cun in dagut pli grond che deriva d’ina persuna infectada.

La probabilitad da survegnir la virola possia s’augmentar entras contacts sexuals, scriva l’Uffizi federal per sanadad.

Datti medicaments u vaccins?
La virola da schimgias enconuschan ins gia pli daditg – cunzunt en l’Africa. Uschia han ins era gia rimnà experientschas co tractar ils sintoms. Plinavant datti per cas pli grevs era ina terapia cun tecovirimat che n’è per il mument anc betg lubì en Svizra.

In vaccin aposta per la virola da schimgias n’exista anc betg. Ma il vaccin ch’ins ha duvrà pli baud per extirpar la virola, porscha era in tschert protecziun cunter la virola da schimgias. Dapi il 1972 na vaccineschan ins en Svizra betg pli sistematicamain encunter la virola, damai che la malsogna è stada extirpada, scriva l’Uffizi federal da sanadad.