Las duas bancas UBS e Credit Suisse vegnan per entant anc ad agir independentamain in da l'auter. Quai munta che l'UBS maina vinavant duas societads principalas separadas. L'integraziun vegnia a succeder pass per pass. Quai ha l'UBS communitgà il mardi.
L’UBS vegnia l’emprim a manar duas societads principalas separadas, l’UBS SA e la Credit Suisse SA, ha l’UBS explitgà. Omaduas societads mainian vinavant lur societads affiliadas e lur filialas, tgirian mintgamai lur clients respectivs e fetschian fatschentas cun cuntrapartidas. La gruppa consolidada vegn a cumpigliar la Credit Suisse SA, tschintg secturs d’interpresa, set funcziuns da concern e quatter regiuns. Mintgina da quellas unitads vegnia represchentada d’in commember da la direcziun dal concern, ch’èn tuts suttamess al schef da l’UBS Sergio Ermotti.
Plinavant ha la banca annunzià intginas decisiuns da persunal, uschia duai il schef da la CS Ulrich Körner daventar commember da la direcziun dal concern da l'UBS.
