Siglir tar il cuntegn

Header

cuntegn

UBS surpiglia Credit Suisse Tge munta quai per mes conto, fond ed ipoteca?

La banca Credit Suisse vegn surpigliada da la UBS. Tge che quai munta per clientas e clients ch'han contos tar la Credit Suisse, ha in expert respundì envers SRF.

Tge munta la surpigliada da la Credit Suisse per clientella ch'ha in conto?

L'expert da finanzas Florian Schubiger di sch'el avess in conto tar la CS, lura fiss el uss pli levgià ch'avant in'emna. La novitad da la fusiun saja en quel reguard ina buna nova.

Fai ina differenza sch'insatgi ha in conto ubain fonds tar la Credit Suisse?

I dettia in'impurtanta e gronda differenza. Contos da banca sajan integrads en la bilantscha da la banca. Vul dir ch'igl exista ina uschenumnada ristga da perdita tar in concurs. Deposits da vaglias percunter sajan ordaifer la bilantscha da banca e n'èn perquai betg pertutgads d'in concurs.

Tge duain possessuras e possessurs da contos far il proxim temp?

Spargnadras e spargnaders pitschens na ston tenor l'expert da finanzas Florian Schubiger far nagut il mument. Ins possia esser levgià cun ina Banca naziunala svizra che funcziuneschia uschè bain ed ina economia ferma. Be uschia saja insumma pussaivel da stgaffir da nov confidenza en ina banca.

Pon ins pia dir ch'ils daners che giaschan uss tar la Credit Suisse èn segirs?

Cun la soluziun actuala sajan ils daners da spargnaders pitschens segirs.

Contos tar la UBS: Na crescha il mument betg il ristg che la banca UBS vegnia er en ina spirala negativa entras surpigliar la Credit Suisse?

In tal scenari saja il mument exclaus, di l'expert. L'UBS fusiunada vegnissia probabel salvada dal stadi per mintga pretsch. Durant las proximas emnas vegnian ils egls ad esser drizzads sin la UBS.

Tge che saja dentant impurtant e valia adina: Tgi ch'ha blers daners tar ina banca, duai diversifitgar sia facultad. A tgi ch'haja auts saldos da conto, cusseglia Florian Schubiger da reparter ses daners sin diversas instituziuns.

Tge capita cun mia ipoteca?

Cun quella na vegnia betg a capitar bler cun la midada. Ipotecas vegnan surportadas tar l'UBS e van là vinavant.

Tge capita cun la terza pitga?

La facultad da la terza pitga vegn surpurtada sin la UBS e resta pia al client e la clienta. Insumma, facultad da la pitga 3-a saja protegida fitg bain, di l'expert. Anc meglier che chapital sin in conto da spargn.

Filialas da Credit Suisse ed UBS en Svizra e Grischun

Avrir la box Serrar la box

RTR actualitad 12:00

Artitgels legids il pli savens