L'ambassadur da l’Ucraina en Svizra, Artem Rybchenko, ha accentuà oz che la conferenza a Lugano saja fitg impurtanta per ses pajais, dentant era per l’Europa. Per exempel sch'i va per il sectur da l’agricultura cunquai che l’Ucraina è in dals gronds producents dad ieli da flur-sulegl u furment.
La conferenza a Lugano vegn organisada da la Svizra ensemen cun l’Ucraina. Cun ina decleraziun da Lugano duai vegnir mess il fundament per la reconstrucziun dal pajais.
En tut sa radunan passa 1000 persunas a Lugano: var 40 stadis èn represchentads e var 15 organisaziuns internaziunalas sco UNICEF u la banca mundiala. Da la Svizra èn preschents il president da la Confederaziun e minister da l'exteriur Ignazio Cassis, la cussegliera federala Simonetta Sommaruga e la presidenta dal Cussegl naziunal Irene Kälin. Er il president da l’Ucraina Wolodimir Selenski è da la partida, dentant online. Però ina gronda delegaziun ucranaisa è preschenta era en persuna a Lugano. Tranter auter il primminister Denys Shmyhal.
La conferenza stoppia ir maun en maun cun la refurma dal pajais, ha ditg Simon Pidoux, l’ambassadur svizzer cun incumbensa speziala per la conferenza. Ed il schef dad el, il minister da l’exteriur Ignazio Cassis, aveva punctuà l’emna passada che la conferenza da l’Ucraina saja ina contribuziun da la Svizra per la stabilitad en Europa e sin il mund.
