Per ils ins èsi ferm tubac – co che las propostas per realisar l’iniziativa sa preschentan. Per exempel per la cussegliera naziunala grischuna Anna Giacometti. Ella haja sezza cumenzà a fimar cura ch'ella era giuvenila, era tras l'influenza da la reclama.
Jau sai quant grev ch’il cumbat cunter la dependenza è, e perquai sai jau quant impurtant ch'igl è da proteger uffants e giuvenils.
Il Cussegl federal aveva fatg la proposta d’ina varianta stricta. Il Cussegl dals chantuns ha però decidì l'onn passà da far excepziuns. Per exempel che firmas da tubac pon vinavant esser sponsuras d’occurrenzas e festivals, e che las firmas da tubac pon esser là cun persunal mobil che porscha lur products. E cigaras e cigarillos duain insumma vegnir exclus dal scumond da reclama.
Suenter il Cussegl dals chantuns ha lura la cumissiun dal Cussegl naziunal mitigià vinavant la regulaziun. Ed uss gievgia debattescha il Cussegl naziunal en chaussa. Ch'i dat in scumond da reclama per uffants e giuvenils, en gasettas e magazins ch’èn era accessibels per quella gruppa sustegna era la cussegliera naziunala Magdalena Martullo. In pli grond scumond na vul ella dentant betg. Ins na possia betg scumandar ad entiras branschas da far reclama, di Martullo.
Sco emprim è il scumond da la reclama da tubac, suenter suonda forsa in scumond da reclama per alcohol u perfin per chips.
Tut auter vesa quai il cusseglier naziunal Jon Pult. Mintga excepziun saja ina massa bler, sch'i va per proteger uffants e giuvenils da tubac. I na dettia nagin motiv da betg restrenscher la reclama. Il socialdemocrat che ha era fimà sias emprimas cigarettas sco giuvenil crititgescha, ch’ins dettia memia bler spazi a la lobby da tubac.
La lobby da tubac ha ina responsabladad per ina massa glieud ferm malsauna e morts dapi decennis. Ed igl è ina portgaria che quels interess èn pli auts che quels da la protecziun e da la sanadad.
Er il politicher da l'Allianza dal Center, Martin Candinas vul in scumond restrictiv da reclama da tubac per uffants e giuvenils.
Nus na pudain betg investir tant en la prevenziun, e suenter laschar far reclama per tubac. Quest quint na va uschia betg si.
La discussiun en il parlament empermetta da vegnir interessanta. Sin maisa è er ina pussaivla violaziun da la Constituziun federala. Ils responsabels per l’iniziativa renfatschan che las propostas schluccadas na resguardan betg l’iniziativa ch'è vegnida acceptada da la populaziun.
