Siglir tar il cuntegn

Header

cuntegn

Uniun purila svizra Nova campagna cunter littering cun num «Rument mazza»

L’Uniun purila svizra less agir cunter il littering sin funs e prads. En sia nova campagna chatta l’uniun pleds clers e mussa in sujet d’ina vatga crappada.

Stgatlas da bavronda u emballadis bittads davent pon avair consequenzas mortalas per vatgas. Perquai lantscha l’Uniun purila svizra ina nova campagna cunter l’uschenumnà «littering». A partir dal mars vegnia a dar placats cun ina vatga crappada sin funs e prads. Dasperas stat scrit: «Rument mazza». Fin uss stevi mo scrit che rument possia far malsaunas las vatgas. L’ultima campagna cunter littering è stada avant 10 onns. Dapli lura saja il littering puspè s’augmentà.

Nus vulain mussar a la glieud tge che po capitar, sche ruments sa tschentan sin las pastgiras e sin ils prads.
Autur: Sandra Helfenstein Uniun purila svizra

Davosa campagna gia avant 10 onns

Avant 10 onns ha l’uniun lantschà la davosa campagna. Quant che quai haja nizzegià saja grev da mesirar, di Helfenstein. Ins na saja betg cler tge che fiss capità sche la campagna n'avess betg existì.

Placat da campagna 2013
Legenda: Placat da la campagna da 2013. RTR

Ma littering resta in problem per l’agricultura. Sa tschentan ruments sin funs e prads chaschuna quai ina gronda lavur supplementara per ils purs e las puras. Sch'ellas survesan rument, spezialmain insatge dir sco ina cuppa u plastic dir, lura po quai ir cun la maschina che taglia il pavel en la maglia da las vatgas, di Helfenstein.

Tocca pitschna da rument en il pavel è privlus

Cura ch'ins sega ils prads vegnan ils ruments manizzads e daventan uschia tocs pitschens e gizs. Sche quels cuntanschan ils maguns da las vatgas, poi dar blessuras internas che pon en il mender  cas chaschunar la mort dals animals, declera Helfenstein.

Or da l'archiv:

video
Giuvens da la Bassa cumbattan il littering en il Parc Naziunal
Or da Telesguard dals 06.10.2017.
laschar ir. Durada: 2 minutas 27 Secundas.

RTR novitads 10:00

Artitgels legids il pli savens