Urizis han purtà venderdi saira en curt temp bler'aua e per part granella sur grondas parts da la Svizra Bassa. Ils servetschs meteorologics han avertì da privel d'inundaziuns. Tenor SRF Meteo han ins mesirà la pli blera plievgia entaifer da trais uras a Chateau d'Oex en il chantun Vad cun 60,5 millimeters – suandà da Buchberg Risibuck, Schaffusa cun 55 milimeters e sil terz plaz è Savognin cun 52,6millimeters.
Meteo Schweiz ha annunzià a las 09:00 ferms urizis a la plazza aviatica da Kloten cun suffels d'enturn 70 kilometers l'ura. En blers lieus hai era dà granella, tranter auter a Berna, Basilea e Turitg. En l’entira Svizra haja dà entaifer da 24 uras passa 15'000 chametgs, ha communitgà SRF Meteo venderdi saira. Ils blers haja dà en il chantun Turitg cun 4’400, ma er en il Grischun haja chamegià radund 2'000 giadas.
Danovamain ina notg tropica
Suenter las chaliras han bleras Svizras e blers Svizzers passentà ina notg tropica cun temperaturas sur 20 grads. Al Lai da Genevra, a Vevey ha il termometer mussà venderdi 24,4 grads curt suenter las 06:00, sco Meteo-Svizra annunzia. Sur 23 grads èsi restà a Würenlingen en l'Argovia, ed a Cham en il chantun Zug. Venderdi suonda in di sitg e chaud cun temperaturas fin a 34 grads. A Cuira datti fin a 32 grads.
Gievgia è stà in di da chalira
La terza unda da chalira da questa stad è arrivada en Svizra. Gia avant las 11:00 han ins mesirà a Binningen / Basilea-Champagna temperaturas sur 30 grads. Local èn las temperaturas creschidas sur 35 grads. Il record: A Genevra/Cointrin è vegnì mesirà 38,3 grads.
Chalira defurmescha binaris
Er il traffic da viafier patescha da la chalira. En il Giura bernais ha il chaud defurmà ils binaris – uschia ch'ils trens tranter Bienna e Péry-Reuchenette dastgan mo charrar cun 40 kilometers l'ura sin intgins trajects. E las Viafiers federalas sa gidan cun aua per sfradentar binaris.
Avertiment da la Confederaziun
Dapi ils dus d'avust vala l'avertiment da la Confederaziun per la terza unda. En las regiuns pertutgadas en il nord da las alps duain las temperaturas maximalas fin venderdi cuntanscher 32 fin 36 grads. Local schizunt fin a 37 grads, scriva Meteosvizra. La notg sa sbassan las temperaturas sin 17 fin 22 grads. Er l'umiditad da l'aria duai s'augmentar, uschia ch'ils dis vegnan pli e pli stitgs. Quai vala sur tut per il punct culminant da l'unda da chalira la gievgia ed il venderdi.
En il Mesauc, en il sid dal Grischun ed il Tessin vala l'avertiment dal stgalim 3 gia dapi il prim d'avust per regiuns sut 600 meters sur mar. Questa unda da chalira pudess dentant esser pli curta che l'ultima da mez fanadur.
En la gronda part da la Svizra tudestga e la regiun da Friburg vegnan las temperaturas maximalas cuntanschidas pir gievgia e venderdi. Per questas regiuns han ins dà or l'avertiment dal stgalim 2.
Plievgia n'è vinavant betg en vista. Sulet intgins urizis poi dar local, sco Meteosvizra scriva. Perquai vala er vinavant en ina fitg gronda part da la Svizra in privel d'incendis da guaud dal stgalim 4 u 5. Ils blers chantuns han gia scumandà da far fieu. Quai vala era per la gronda part dal Grischun.
