La vaccinaziun da booster pudess en Svizra bainprest er esser accessibla per tuts. Quai rapportan las gasettas da la dumengia. Ins stoppia accelerar la vaccinaziun da booster per tuts, sche la quota da vaccinar na s’augmentia betg pli. Quai ha ditg il president da la Confederaziun, Guy Parmelin, en l’intervista cun la «NZZ am Sonntag». El saja persvas che la terza vaccinaziun stoppia vegnir schlargiada sin l’entira populaziun il proxim temp.
L'emprim persunas sur 65
Christoph Berger, il president da la cumissiun federala da vaccinar, ha ditg en la «Sonntagszeitung» che tuts possian survegnir la terza dosa, uschespert che tuts sur 65 – che veglian – hajan survegnì ella. Quai vegnia probabel anc ad esser il cas quest onn.
Decisiun gia la mesemna?
Tenor «Sonntagsblick», che sa basa tenor atgnas indicaziuns sin «funtaunas segiras», duaja la cumissiun gia dar la mesemna glisch verda per tuts sur 12 onns ch'hajan survegnì la segunda vaccinaziun avant passa in mez onn.
