Siglir tar il cuntegn

Header

video
Nora Kronig: «Pli che 2 milliuns dosas èn vaccinadas»
Or da News-Clip dals 20.04.2021.
laschar ir
cuntegn

Vaccins Retards da furniziun da Moderna

La Confederaziun survegn bain mintg’emna vaccins cunter corona, dentant variescha mintgamai la quantitad. Perquai restian tenor l’Uffizi federal da sanadad las malsegirezzas en quest connex grondas. Uschia ha declerà Nora Kronig da l'Uffizi federal da sanadad avant las medias. Uschia furneschia Moderna il matg 200'000 dosas pli pauc che empermess. Questas dosas vegnian furnidas supplementarmain il zercladur. Ils chantuns stoppian vinavant restar flexibels ed adattar lur plans da vaccinar.

Dischagreabel e frustrant per il chantun

Il retard da Moderna saja dischagreabel e frustrant per il Grischun. Quai ha il minister da sanadad Peter Peyer confermà sin dumonda dad RTR. Il retard è vegnì enconuschent gist il medem di cura ch’il chantun ha annunzià d’avrir sonda en la halla da la citad da Cuira in center da vaccinar. Vid quests plans na sa midia nagut – probablamain dettia dentant retards tar ils termins per sa laschar vaccinar, uschia Peyer vinavant. El veglia era reponderar la strategia da vaccinar: Fin uss ha il chantun mess d’in maun las dosas per la segunda vaccinaziun – cun ils retards saja da ponderar sch’ins veglia restar da questa decisiun ubain vaccinar tanta glieud sco pussaivel almain cun ina dosa.

audio
Tge muntan ils retards da Moderna per il chantun Grischun?
03:02 min, Actualitad dals 19.04.2021.
laschar ir. Durada: 03:02 minutas.

Sper quai ha Nora Kronig dal BAG er ditg che la Svizra haja cuntaschì l'emna passada la marca da 2 milliuns dosas ch'èn vegnidas vaccinadas.

Adina dapli giuvens s'infecteschan

In motiv per quest svilup pudess la varianta britannica esser, ch’è pli agressiva che las autras, ha ditg Patrick Mathys da l'Uffizi federal da sanadad. Tar las persunas tranter 40 e 60 onns èn las ospitalisaziuns creschidas marcantamain, cunzunt sin las staziuns intensivas. Il dumber da cas tar persunas sur 80 onns è percunter sa reducì pervia da la vaccinaziun. Il medem svilup sa mussa er tar las ospitalisaziuns: dapi la fin dal 2020 è il dumber d’ospitalisaziuns tar persunas sur 60 onns sa reducì.

Confederaziun cumpra medicament da Roche cunter corona

La Confederaziun haja suttascrit in contract cun il concern da farmazia svizzer Roche. Quai ha communitgà l'Uffizi federal da sanadad BAG. Dals medicaments sa tractia d’uschenumnadas terapias cumbinadas d’anticorpuls monoclonals. Quests medicaments vegnian sprizzads als pazients per neutralisar il virus. Studis hajan cumprovà che quests medicaments protegian a moda effizienta cunter grevas furmas da la malsogna. Las emprimas 3'000 dosas duajan vegnir furnidas mez matg.

2'141 novs cas

L'Uffizi federal da sanadad ha annunzià 2'141 novas infecziuns cun il coronavirus. 13 persunas èn mortas en consequenza. Uschia è la media da set dis 1% pli bassa che l'emna avant. Las cifras stagneschan actualmain.

RTR novitads 11:30

Artitgels legids il pli savens

Scrollar a sanestra Scrollar a dretga