Siglir tar il cuntegn

Header

cuntegn

Val dal Blegn Sajettà luf tar ina stalla da nursas

En la Val dal Blegn sin la vart tessinaisa è mesemna vegnì sajettà in luf giuven.

L'uffizi da bajegiar, traffic ed economia forestala tessinais ha rapportà che il personal dal chantun ha sajettà in luf giuven gist tar ina stalla da nursas. Quest luf giuven tutga tar in triep ch'ins ha observà avant pir in mais. Las autoritads avevan lura observà dus lufs giuvens. Uschia valevan la regla sajettar in luf dad in triep, e betg per in luf singul.

Premissas per sajettar in luf (enfin fanadur 2023)

Avrir la box Serrar la box

Tenor l'ordinaziun federala da chatscha dastga in luf singul vegnir sajettà, suenter ch’el accumplescha ina da las suandantas premissas:

  • stgarpà entaifer quatter mais 25 animals da niz pitschens
  • stgarpà entaifer in mais 15 animals da niz pitschens
  • stgarpà entaifer quatter mais 10 animals da niz pitschens, sch'igl ha pli baud gia dà donns entras lufs
  • stgarpà entaifer quatter mais 2 animals da niz gronds

Sco animals da niz gronds valan las spezias bovinas, equestras e camelids dal mund nov – tranter auter èn quai vatgas, chavals, asens, camels e lamas. E las reglas valan mo sche mesiras da protecziun supportablas èn gia avant maun.

Lufs d'in triep dastgan vegnir sajettads sche quel:

  • ha stgarpà entaifer quatter mais 10 animals da niz
  • è sa reproducì en il medem onn

Maximalmain la mesadad dals chaniels dastgan vegnir sajettads.

Sch'i sa tracta d'in luf ch'appartegn ad in triep è ina lubientscha dal BAFU necessaria per pudair sajettar. Tar in luf singul dastga il chantun dar la lubientscha da sajettar senza consentiment da l'Uffizi federal d'ambient.

La lubientscha da sajettar quest luf è vegnida dada suenter ch'il triep ha chaschunà gronds donns tar animals da niz durant l'avust e l'october, tenor l'uffizi. Tar las unfrendas dals lufs tutgian er trais arments (biestga grossa).

audio
Per tadlar: las novitads da las 12:00
ord RTR Audio dals 02.12.2022.
laschar ir. Durada: 5 minutas 24 Secundas.

RTR novitads 12:00

Artitgels legids il pli savens