Il pli grond shop online da la Svizra, Digitec Galaxus, ha vendì il fanadur 470% dapli radiaturs electrics, cumpareglià cun la medema perioda da l’onn passà. Gia il zercladur saja il dumber vendì s'augmentà per 370%. Quai scriva il shop sin sia pagina d’internet. La raschun saja la tema da blers Svizzers da betg avair avunda gas da stgaudar durant l’enviern pervi da la guerra en l’Ucraina.
Expert avertescha da consequenzas negativas
Envers la gasetta «SonntagsZeitung» scusseglia Michael Frank, il directur da l’Uniun da las ovras electricas svizras da duvrar stgaudaments electrics d’urgenza. Il privel saja numnadamain ch’ils accumulaturs electrics en ils lais da fermada svizzers vegnian uschia svidads pli spert. Quests accumulaturs sajan dentant impurtants per il provediment cun forza electrica l’enviern.
Lura n'avess la Svizra betg mo in grond problem cun il gas, mabain er bainprest cun il current electric.
L'applicaziun da millis da quellas pignas electricas possia chaschunar gronda instabilitad en la bilantscha d'energia. Lura n'avess la Svizra betg mo in grond problem cun il gas, mabain er bainprest cun il current electric, uschia Frank.
