Siglir tar il cuntegn

Header

Navigaziun

helicopter davant pariad da crap si.
Legenda: Las siglientadas dovran ina preparaziun intensiva – las lavurs san be vegnir fatgas grazia helicopters. Keystone, Astra
cuntegn

Via d'Axen resta serrada Bovas, grippa e siglientadas – la via d'Axen na vegn betg a paus

La via d'Axen en la Svizra centrala è gia serrada dapi ils 28 da fanadur – e quai vegn ella a restar anc per otg emnas. Quai rapporta l'agentura da novitads SDA tenor ina communicaziun da l'Uffizi federal da vias Astra.

Dus grippuns han da vegnir siglientads

Sin la via, che collia ils chantuns Sviz ed Uri, vegnia adina puspè giu crappa, scriva l'Astra. Perquai saja planisà da siglientar dus grippuns dad in volumen da tranter 200 e 300 meters cubic.

Ma las lavurs sajan cumplitgadas – ils dus grippuns sa chattian numnadamain radund in kilometer sur la via e crodian giu directamain sin ella.

Lura vegn installà in sistem d'observaziun

Cun quai che las lavurs da furar stoppian vegnir fatgas cun helicopters influenzeschia er l'aura adina puspè il svilup da las lavurs. Cura ch'ils grippuns vegnan siglientads na possia perquai anc betg vegnir ditg exactamain.

Cler saja che la via haja da restar serrada er suenter las siglientadas: Lura vegnia installà l'emprim in sistem d'observaziun, scriva l'Astra.

RR novitads 17:00