La terra franca da la Spagna è a partir da sonda era sin la glista da pajais da ristg causa il coronavirus da la Confederaziun. Vul dir persunas che viagian davent da là da la Spagna en Svizra ston ir 10 dis en quarantina – cun excepziun da las inslas Balearas e Canaras. Quai ha communitgà il Departament federal da l'intern.
Cunquai èn ussa 46 pajais e regiuns sin la glista cun territoris da ristg pervi dal coronavirus. Persunas che viagian d'in da quels pajais u d'ina da quellas regiuns en Svizra ston s'annunziar aifer dus dis tar las autoritads chantunalas. Quellas controllan lura che las persunas sa tegnan er vid la quarantina. Actualmain sa chattan bunamain 16'300 persunas en quarantina, perquai ch'ellas èn viagiads d'in pajais da ristg en Svizra.
