Siglir tar il cuntegn

Header

audio
Co e daco cumprar ina vignetta electronica
Or da Il Digitip - il tip digital dals 08.01.2024. Maletg: Keystone
laschar ir. Durada: 6 minutas 36 Secundas.
cuntegn

Vias naziunalas Co e daco cumprar ina vignetta electronica

Davent dal favrer dovri la nova vignetta per las autostradas. Dapi l'avust datti era la versiun digitala. Nua pon ins cumprar quella, tge avantatgs porscha quella e nua ston ins esser precaut?

Il 2023 ha la Confederaziun lantschà la vignetta electronica per duvrar las autostradas svizras. Dapi l'avust è quella gia disponibla. Cun la midada da l'onn vegnia quai uss er in tema per tut ils automobilists che dovran ina nova vignetta per il 2024. E gea, era la vignetta tradiziunala da tatgar datti anc adina, tar quella na sa mida nagut. Ma la versiun electronica porscha avantatgs.

Tge avantatgs porscha la vignetta electronica?

La e-vignetta è liada vi dal numer da l'auto e betg pli vi dal vehichel. Quai porscha plirs avantatgs.

  • Sch'ins cumpra in nov auto e salva il numer na dovri betg ina nova vignetta.
  • Schins ha in numer da stgamiar (Wechselnummer) basta ina vignetta electronica.
  • Ins po midar il numer e surpigliar la vignetta sch'ins – per exempel – mida chantun.
  • Sgarar giu la veglia e tatgar la nova vignetta scroda.

Nua pos jau cumprar la e-vignetta?

La vignetta datti directamain tar la Confederaziun sin la pagina d'internet, in link sa chatta a la fin da quest artitgel. Quai è la suletta funtauna uffiziala per quella vignetta electronica. Sche autras paginas u reclamas sin il telefonin porschan la vignetta èsi dad esser precaut: Per ordinari èn quellas purschidas pli charas – ed i po dar cugliunarias.

Pajar pon ins cun carta (Visa, Master, American Express, PostFinance), via online-banking da la PostFinance, cun TWINT u cun Google Pay. Sco che SRF scriva, duai er dar la pussaivladad da pajar cun quint.

e-Vignette kaufen
Legenda: Sin questa pagina pon ins cumprar la vignetta electronica. Selecziunar il tip da vehichel, il pajais ed inditgar il numer da l'auto. Lura èsi be anc da pajar. Uffizi federal da la duana e da la segirezza dals cunfins

Stos jau ma registrar ed inditgar datas?

La e-vignetta pon ins cumprar anonim. Il sulet necessari è il numer da l'auto. Ins po dentant era inditgar ina adressa dad e-mail per retschaiver la quittanza u sa registrar sin il portal cun il num. Lura han ins era pli tard access a la cumpra e po far pitschnas adattaziuns.

Per declerar la purschida ha la Confederaziun publitgà in filmin animà.

RTR Digitip 10:15

Artitgels legids il pli savens