A chaschun dal dialog «violenza a chasa» èn Confederaziun, chantuns ed organisaziuns socialas s'inscuntrads il venderdi per discutar en chaussa. Da la partida è era stada la ministra da giustia, Karin Keller-Sutter.
Ils discurs èn vegnids a la conclusiun ch'i dettia anc potenzial tar la protecziun d'unfrendas e tar la realisaziun da mesiras actualas. Per quest motiv han ins er deliberà differentas mesiras concretas. Uschia duain unfrendas da violenza en il futur pudair dar alarm cun in nuv d'urgenza e telefonar sin in numer da telefon central ch'è occupà 24 uras al di.
Augment dals delicts
Il 2020 ha la polizia registrà var 20'000 delicts en connex cun violenza a chasa. 28 persunas èn vegnidas assassinadas. Plirs posts da polizia han annunzià l'onn passà in augment da violenza a chasa. Quest augment vegn declerà cun las mesiras cunter la derasaziun dal coronavirus, dentant era cun il fatg ch'ins saja oz pli sensibilisà tar quest tema.
Ord l'archiv
La manadra da la Chasa da dunnas dal Grischun è persvadida: «La violenza a chasa va tiers a nus tuts».
