La fin avust è il levgiament tar l'Agid cunter AIDS e la federaziun tetgala dals omosexuals Pink Cross stà grond. Lura aveva il Cussegl federal decidì da cumprar 40'000 dosas encunter la virola da schimgias. Enfin uss èn numnadamain sur tut umens che han sex cun umens s'infectads cun la virola da schimgias.
Anc suttascrit nagin contract
In contract cun l'interpresa Bavarian Nordic na datti dentant betg. Sco l'Uffizi federal da sanadad publica BAG scriva sin dumonda da SRF, sajan ins actualmain vi da las contractivas cun il producent dal vaccin e da medicaments. Uschè spert ch'ils contracts sajan sut tetg vegnia il BAG ad infurmar.
Roman Heggli, il mainagestiun da Pink Cross n'ha nagina chapientscha ch'i dat sis emnas suenter la decisiun dal Cussegl federal anc nagin contract. Il BAG fa attent che quests contracts dovrian temp. Sur tut perquai ch'i saja anc da sclerir fatgs davart lubientschas.
Punct culminant para d'esser cuntanschì
Malgrà ch’il vaccin manca, va il dumber d’infecziun dentant enavos en Svizra. Per quest svilup datti tenor Florian Vock da l’Agid svizzer cunter AIDS duas raschuns: Per l’ina hajan ils pajais vischins da la Svizra lubì la vaccinaziun, per l’autra hajan las gruppas da risico adattà lur cumportament sexual.
