Il dumber da persunas che laschan virolar è creschì fermamain ils ultims onns en Svizra. E quai tar tut las virolas, declera il medi Daniel Koch da l'Uffizi federal da sanadad. Ils ultims 10 onns saja vegnì fatg fitg bler per promover il virolar. Avant 10 onns era il dumber da persunas viroladas en Svizra en media tar bun 82%. Oz saja quest dumber tar 95% tar las virolas «classicas».
Ils medis da chasa u era las scolas sajan oravant tut responsablas per in creschament da quest dumber. Spezialmain er quai che pertutga la virola cunter il virustgel.
Adina dapli persunas laschan virolar - adina pli pauc vaccin è avant maun
Igl è in problem ch'i na deva betg avant 10 fin 20 onns. Il problem d'avair ina reserva avunda gronda da vaccin. Ozendi na vegn la producziun dentant betg pli da tegnair pitg a la dumonda.
La buna novitad è ch'adina dapli persunas vegnan viroladas, er èn terras pli paupras.
Il problem è ch'i na dat betg bleras firmas da farma che produceschan virolas. Plinavant è la producziun fitg cumplexa. Uschia dovri er bler temp da producir virolas.
Ils ultims onns saja, per exempel, la virola cunter la paralisa infantila (Kinderlähmung) adina puspè stada stgarsa, di Daniel Koch. Ed er quella dal virustgel n'è betg avant maun senza fin.
RR actualitad 07:00
