N'era betg oz, il di cura ch'ils set commembers da la regenza svizra s'entaupan per lur sesida emnila èn els sa drizzads a las medias. È quai tactica en vista a la dumengia da votaziun u valitescha il Cussegl federal la situaziun epidemiologica sco betg uschè dramatica?
Chapientscha per l’agir u betg agir dal Cussegl federal ha il cusseglier naziunal da l’Allianza dal Center, Martin Candinas. I saja bain in fatg che las cifras d'infecziun cun il coronavirus creschian. Ins vesi dentant era che las ospitalisaziuns na creschian betg tuttina spert sco quai ch'ellas faschevan anc avant in onn durant la segund‘unda.
Quai è il mussament che la vaccinaziun ha purtà insatge. E tenor mai è quai era mussament ch’ins na sto ussa betg exagerar cun prender immediat mesiras.
Il Cussegl federal saja il mument en ina situaziun fitg difficila, manegia Candinas. El na stoppia betg mo avair en egl la situaziun epidemiologica, mabain era l’aspect da la convivenza. I dettia blers che veglian dismetter il certificat da Covid che vegnia duvrà en fitg blers secturs da noss mintgadi. Da l'autra vart dettia era blers che giavischassan dapli restricziuns e protecziun.
Qua sto la Svizra chattar ina via amez che vegn acceptada pli u main da tuts. Per uschia era segirar la votaziun che vegn. E quai è segir in dals motivs ch’il Cussegl federal sa tegna uss enavos. Ed jau hai il sentiment che vesì strategicamain n’è quai betg fallà.
Che la situaziun curt avant la votaziun davart la lescha da Covid-19 saja difficila per la regenza crai er il cusseglier naziunal socialdemocratic Jon Pult.
Igl è cler che ina vart interpretass novas mesiras u communicaziuns dal Cussegl federal sco part d'ina propaganda politica. Quai na dastga betg esser. Il medem mument ha il Cussegl federal ina responsabilitad. Igl è segiramain er in element tactic. Ma la fin èsi objectivamain difficil da trair curt avant ina votaziun decisiuns epidemiologicas.
El haja vinavant confidenza che las autoritads valiteschian correctamain la situaziun critica, en la quala la Svizra sa chatta il mument ed el spetgia era ch'il Cussegl federal surprendia responsabladad e communitgeschi pli baud u pli tard tge ch'igl è da far. Il pli impurtant è per Pult il mument dentant in'autra chaussa.
Quai che las autoritads responsablas ston far è propi da dar subito l’ok al booster per tut las persunas che vulan quel. Quai è impurtant per quellas che sa sentan ed èn pli segiras. Ma quai è tenor mai er ina da las mesiras las pli impurtantas per reducir la circulaziun dal virus.
Cler è per el en tutta cas ch'ins sto uss empruvar da sa preparar uschè bain sco pussaivel sin la stagiun d’enviern. Da surmuntar quella en ina moda e maniera segira vegnia pli grev e betg pli simpel. Cunzunt era perquai ch'anc adina memia paucas persunas en Svizra hajan laschà far la vaccinaziun.
