Siglir tar il cuntegn

Header

RTR Grafica
Legenda: RTR Grafica
cuntegn

Votaziuns dals 28 da november Maioritad per la lescha da Covid-19

Sch'il suveran avess decis ils 7 da november areguard la lescha da Covid-19, avessi dà in Gea. Quai mussa la segunda retschertga da gfs.berna ch'è vegnida fatga per incumbensa da la SRG SSR.

Il sustegn per la lescha da Covid-19 resta stabil er en la fasa decisiva dal cumbat da votaziun. Bun 61% da las votantas e dals votants avess ils 7 da november ditg Gea a la lescha. Er stabil è il dumber d'adversaris – cun 38% da las votantas e dals votants. Be in pertschient resta indecis. Malgrà ch'il sustegn e l'opposiziun n'èn betg sa midads en cumparegliaziun cun l'ultima retschertga, datti intgins indizis che la polarisaziun tranter las gruppas è creschida.

Cunzunt tranter las differentas partidas è la polarisaziun sa pegiurada. Da la sanestra fin tar la PLD è il sustegn per la lescha da Covid-19 detg solid u schizunt creschì. Tut auter è la situaziun tar ils aderents da la PPS. Là è l'opposiziun creschida. Quest svilup è però stà da spetgar. Ils votants e las votantas èn s'avischinads a la parola da la partida-mamma.

audio
Trend da la votaziun en connex cun la lescha da Covid-19
aus Actualitad vom 17.11.2021.
abspielen. Laufzeit 4 minutas 39 Sekunden.

Gronda maioritad per l'iniziativa da tgira

Ils 7 da november avessan dus terzs dals votants e da las votantas sustegnì la lescha da tgira. Be 27% fissan stads cunter l'iniziativa e 6% èn anc indecis. Il sustegn per l'iniziativa è bain sa reducì per 11 puncts procentuals. Che iniziativas perdan sustegn durant il cumbat da votaziun n'è però nagut che fa surstar. Tuttina: Er en vista al trend actual prognostitgescha gfs.berna in cler Gea ils 28 da november. En tuttas gruppas dumandadas, cun excepziun d'electurs da la PLD, è numnadamain ina maioritad per l'iniziativa da tgira. Tar ils liberaldemocrats èn 55% dals dumandads s'exprimids cunter il project da votaziun.

Ils arguments per l'iniziativa, che pretenda che la Confederaziun ed ils chantuns promovan la tgira sco element impurtant dal provediment da sanadad, èn vinavant incontestads. Per quest motiv han ils adversaris er problems d'argumentar cunter quella. Cunzunt l'argument ch'il squitsch sin la branscha saja creschì durant la pandemia da corona po persvader. Var 80% dals dumandads èn da l'avis ch'i dovra dapli che applaus per reducir il squitsch. La crisa en la tgira, sco er la situaziun da las pajas, laschan schizunt 90% dals dumandads valair sco argument.

audio
Iniziativa da tgira: Tge capita en il parlament tar in Gea?
aus Actualitad vom 16.11.2021.
abspielen. Laufzeit 3 minutas 15 Sekunden.

Trend Na a l'iniziativa da giustia

Sch'il suveran avess decis l'entschatta november areguard l'iniziativa da giustia, avess ina maioritad pli probabel ditg Na a l'iniziativa. En las ultimas emnas è il trend vers in Na s'intensivà – 50% dals dumandads fissan stads cunter, 41% per l'iniziativa. Auter che tar tschels dus projects da votaziun, datti dentant anc blers che n'han anc betg decis areguard l'iniziativa – en tut èn quai 9%. Tar l'emprima retschertga da Sotomo eran anc 42% s'exprimids cunter e 43% per l'iniziativa.

Tant ils aderents sco er ils adversaris da l'iniziativa da giustia han arguments che pon persvader las votantas ed ils votants. Tar ils iniziants po l'argument ch'il sistem actual sclaudia candidatas e candidats pervia da la dependenza da partidas, persvader il pli fitg. Tar ils adversaris èsi il sustegn per il status quo ch'è sa cumprovà dapi onns. L'iniziativa po bain persvader cun sia intenziun, dentant il trair la sort è plitost dispitaivel. En pli spetga l'iniziativa il medem destin sco las bleras: malgrà blera simpatia perda ella sustegn. Uschia èsi da quintar cun in Na ils 28 da november.

La retschertga

Avrir la box Serrar la box

L'institut gfs.berna ha fatg la retschertga per incumbensa da la SRG SSR. L'institut ha dumandà 23'997 votantas e votants tranter ils 3 ed 11 da november 2021. La quota da sbagl munta a +/- 2,8 puncts procentuals.

audio
Reproschas davart manipulaziuns vid retschertga SRF
aus Actualitad vom 17.11.2021.
abspielen. Laufzeit 2 minutas 22 Sekunden.

Retschertga manipulada?

Avrir la box Serrar la box

Il portal da novitads ‘Inside Paradeplatz’ ha rapportà il mardi (16-11-2021) da pussaivlas manipulaziuns da las enquistas en vista da las votaziuns federalas che l’institut da perscrutaziun GfS Berna fa regularmain per incumbensa da la SSR SRG.

En ina communicaziun ha SRF prendì posiziun sin las renfatschas. Las enquistas da GfS Berna na sajan betg da cumparegliar cun las enquistas simplas sin las paginas internet da SRF. Las enquistas da GfS Berna vegnian fatgas tenor ina metodica scientifica e sa basian sin ina cumbinaziun dad enquistas online ed enquistas per telefon.

Lukas Golder, Co-manader da GfS Berna: «Noss resultats sa basan principalmain sin enquistas per telefon represchentativas. Las enquistas online cumplementaras concepin nus sapientivamain fitg avert, per betg crear obstachels tar la participaziun. Tar l’evaluaziun applitgain nus ina metodica scientifica. Uschia pudain nus identifitgar irregularitads tar las enquistas online gia tar la controlla da las datas. Tar la reuniun da l’enquista per telefon sco grondezza da referenza segirescha l’enquista online cumplementara sulettamain la constataziun. Perquai n’èsi betg pussaivel da manipular ils resultats da nossa enquista».

Communicaziun uffiziala SRF

Dossier online

Avrir la box Serrar la box
Dossier online

Sin in clic tut las fatschentas federalas e communalas: rtr.ch/votaziuns

RTR novitads 06:00

Artitgels legids il pli savens

Scrollar a sanestra Scrollar a dretga