Fiss il suveran svizzer ì ils 9 d'october a l'urna avessi dà in cler Gea per l'Iniziativa da tgira. 78% da las votantas e dals votants avessan sustegnì l'iniziativa che pretenda che la Confederaziun ed ils chantuns promovan la tgira sco element impurtant dal provediment da sanadad en Svizra. I duai dar avunda persunal qualifitgà, las cundiziuns da lavur duain vegnir regladas e las clamadas duain esser attractivas.
L'iniziativa survegn sustegn sur tuttas regiuns linguisticas ed er tar tuttas partidas. Tant tar la sanestra sco er tar la dretga è ina maioritad per l'iniziativa. La dretga ha bain in zic dapli resentiments, la differenza n'è però betg uschè gronda. La pli gronda cumpart Na datti tar la PLD e tar la PPS. Tar la PLD avessan 34% da las votantas e dals votants ditg Na, tar la PPS 22%. Il pli grond sustegn datti tar la sanestra: var 90% da la PS e 92% dals Verds fissan s'exprimids ils 8 d'october per l'iniziativa.
Ils motivs per il sustegn èn clers. Blers resentan il squitsch sin la branscha da tgira sco fitg grond. 73% dals dumandads na van betg perina cun l'argument che la paja saja en cumparegliaziun europeica gia fitg auta. Plinavant èn 84% da l'avis ch'i stoppia dar dapli che mo applaus per la tgira. Corona haja segir giugà ina rolla impurtanta. En general è ina maioritad da l'avis ch'i sto vegnir fatg insatge tar la branscha.
Resultat anc avert
Il mument sajan las schanzas ch'i dettia ils 28 da november in Gea pli grondas che las schanzas ch'i dettia in Na. Tenor la auturas ed auturs da la retschertga gfs.berna dettia diversas raschuns che pledeschan per il reussir da l'Iniziativa da tgira.
Iniziativa da giustia è anc averta
Dapli segns da dumonda che tar l'Iniziativa da tgira datti tar l'Iniziativa da giustia, tar quella è anc tut avert. Avess la votaziun gì lieu l'entschatta october fiss sulettamain ina pitschna maioritad stada per l'iniziativa, vul dir: 43% da las votantas e dals votants avessan ditg Gea u plitost Gea. Simpatia per l'iniziativa, che vul eleger derschaders federals cun trair la sort, datti cunzunt tar la sanestra. Entant ch'il center e la dretga èn plitost cunter quella.
Tenor ils resultats da la retschertga fiss in Gea a l'iniziativa bain teoreticamain pussibel, en la realitad na saja quai però pauc probabel. En general perdan iniziativas sur il temp sustegn.
In Gea a la lescha da Covid-19
Auter che tar las duas iniziativas sa mussan tar la Lescha da Covid-19 cleras differenzas tranter las partidas. Tar la sanestra fin, al Center e schizunt tar la PLD fissan ina maioritad dals dumondas per la lescha. Auter è la situaziun tar ils aderents da la PPS. Ina clera maioritad da la partida dretg-naziunala, vul dir 59%, fissan stads cunter la lescha. En general lascha dentant dir che la lescha ha bunas schanzas, in Na pon ins però anc betg sclauder.
Igl è la segunda votaziun davart la lescha da Covid-19: Ils 13 da zercladur ha il suveran gia acceptà quella cun 60% da las vuschs. Uss hai danovamain dà in referendum, quella giada cunter las adattaziuns ch’il parlament ha fatg il mars 2021 en la lescha.