L’iniziativa da tgira giaja memia lunsch, da quest avis è il Cussegl federal che sustegna perquai la cuntraproposta. L'iniziativa pretenda che la Confederaziun ed ils chantuns promovan la tgira e che la Confederaziun regla las cundiziuns da lavur.
Cuntraproposta indirecta a l'iniziativa
Il Cussegl federal sco er il parlament vulan sustegnair la professiun da tgira ed han perquai elavurà ina proposta indirecta che cumpiglia las impurtantas pretensiuns da l’iniziativa. Per promover la scolaziun en quest sectur mettan la Confederaziun ed ils chantuns a disposiziun ils proxims otg onns ina milliarda francs. Tenor il Departement federal da l'intern sajan bunas cundiziuns da lavur e pajas fairas impurtantas per che las professiuns en la tgira restan attractivas e ch'il persunal resta uschè ditg sco pussaivel. Procurar per quellas cundiziuns da basa duain vinavant communablamain ospitals, chasas da tgira, organisaziuns da spitex sco er ils chantuns ed ils partenaris socials. Er ils chantuns recumondan da dir Na a l'iniziativa ed uschia sustegnair la cuntraproposta indirecta.
Il suveran svizzer decida ils 28 da november a l’urna davart l’iniziativa da tgira. Sche l'iniziativa vegn refusada, entra la cuntraproposta indirecta en vigur sche quella na vegn betg cumbattida cun in referendum.
Cuntraproposta va memia pauc lunsch
Per il comite d'iniziativa cumpiglia la cuntraproposta indirecta memia pauc. Las investiziuns dal parlament en la furmaziun giajan a perder cunquai che passa 40% dal persunal da tgira midia professiun suenter paucs onns, uschia l'argumentaziun. I manchian mesiras che megliurian las cundiziuns da lavur e la qualitad da la tgira.
