L'agricultura intensiva saja sut pressiun, scriva il comité. Las consequenzas da la muria d'insects, polluziun d'aua, la perdita da la fritgaivladad dal terren e da spazis ecologics chaschunian custs enorms. I dovria perquai in'agricultura pli sauna ed ecologica.
Duas iniziativas, duas vias
L'iniziativa d'aua da baiver pretenda in provediment cun aua da baiver netta per tut ils carstgauns en il pajais. Purs duain mo pli survegnir subvenziuns, sch'els desistan da pesticids ed antibiotica. Er per la perscrutaziun e furmaziun duain valair las medemas cundiziuns. Per la midada duain ils purs e las puras survegnir otg onns temp.
L'iniziativa da pesticids pretenda in scumond da pesticids sintetics tar la producziun agricula, tar l'elavuraziun da products agriculs sco er tar la tgira da la cuntrada. Er l'import da products ch'èn vegnids producids cun pesticids duai vegnir scumandà.
Omaduas iniziativas vegnan ils 13 da zercladur a l'urna. Il Cussegl federal da sia vart refusa omaduas iniziativas.
La discussiun en il Controvers
En il Controvers han discussiunà Stefan Engler e Jon Pult davart las duas iniziativas agraras ch'ans spetgan a las proximas votaziuns.
