Siglir tar il cuntegn

Header

cuntegn

Yves Flückiger President dals recturs da las scolas autas vul examens da matura

Il president dals recturs da las scolas autas en Svizra è persuenter da laschar far ils examens da matura.

Purtret dad Yves Flückiger durant in pled.
Legenda: Yves Flückiger vul ch'ils gimnasis mainian tras ils examens a scrit per la matura. Keystone

Yves Flückiger spera ch'il Cussegl federal decida da laschar far en tut ils chantuns ils examens da matura a scrit. Sco el ha ditg en in intervista cun las gasettas da CH-Media, restia ina macla sch'ins survegnia la matura senza examen final. Quel haja ina valur simbolica e marcheschia la fin dad in'impurtanta part en la carriera da furmaziun.

Quai fiss sco da far il Tour de suisse senza etappa finala.
Autur: Yves Flückigerpresident dals recturs da las scolas autas

Flückiger ha declerà ch'el haja gronda fidanza en ils chantuns, las scolas ed ils scolasts ch'els resguardian la situaziun extraordinaria er per ils examen da matura. Ils examens possian ins gea adattar uschia, ch'ins possia desister da dumondas davart il material ch'ins haja tractà be en las lecziuns sin distanza.

Sch'il Cussegl federal surlaschia als chantuns da decider davart ils examens, na fissan ils resultats betg pli cumparegliabels, ha declerà Flückiger vinavant.

Ils scolars na vegnissan betg valitads sin ina moda unitara, i na dess betg dapertut las medemas premissas.
Autur: Yves Flückigerpresident dals recturs da las scolas autas

Ord l'archiv:

La fin mars aveva la regenza grischuna anc decidì da midar nagut vid ils examens per la matura. Là avevan ins gist cumenzà a sa preparar per l'instrucziun online.

RTR novitads 09:00

Artitgels legids il pli savens

Ir a sanester Ir a dretg