Siglir tar il cuntegn

Header

audio
Emil Müller, il president da Zernez davart sia elecziun ad Egnach
Or da RTR Audio dals 28.11.2021.
abspielen. Laufzeit 4 minutas 15 Sekunden.
cuntegn

Zernez Emil Müller è vegnì elegì sco president communal dad Egnach

Il president communal actual da Zernez, Emil Müller, è vegnì elegì sco nov president communal ad Egnach, ina vischnanca en la regiun dal Lai Bodan en Turgovia. El ha obtegnì 1'196 da las vuschs, tge che correspunda a 55,9% da las vuschs valaivlas. Il pli absolut è stà tar 1'070 vuschs. L'Engiadinais ha gudagnà la cursa per quest post cunter dus ulteriurs candidats.

Per dir la verdad, jau sun surprais ch'igl ha funcziunà cun l'emprim scrutini, e lura era anc usché cler. Quai n'hai jau betg spetgà, quai stoss jau dir sinceramain. Jau hai spetgà ch'i dettia in segund scrutini.
Autur: Emil Müller nov president communal dad Egnach en Turgovia
audio
Emil Müller: «Jau sun surprais ch'i ha funcziunà en l'emprim scrutini»
aus RTR Audio vom 28.11.2021.
abspielen. Laufzeit 16 Sekunden.

Emil Müller vegn a bandunar Zernez la fin da matg 2022. Lura vegn il vicepresident communal Riet Denoth, a surpigliar la responsabladad fin la fin da l'onn 2022. 

Decidì gia avant da betg pli candidar

Independent da questa elecziun, aveva Emil Müller gia avant decidì da betg pli candidar sco president da Zernez. El è stà dapi il 2000 fin il 2014 president communal da Susch ed ha surpiglià il 2015 l'uffizi sco president da la vischnanca fusiunada da Zernez. Plinavant è el era dapi 2014 cusseglier grond per l'Allianza dal Center.

Grond plaschair

Emil Müller ha grond plaschair da sia elecziun. El haja però era grond respect da cummenzar quella sfida nova. El na saja betg vegnì eligì be uschia, i dettia franc er aspettativas a sias experientschas sco president communal. Perquai saja era il squitsch dad ademplir quellas aspettativas qua. Qua en il Grischun haja el ina gronda rait e fitg buns contacts, quai simplifitschia natiralman enorm la lavur. En la Turgovia stoppia el stgaffir sia rait ed ils contacts, da quai haja el grond respect. Però la glieud saja fitg averta, quai haja el constatà durant il cumbat electoral. La pli gronda differenza cumpareglià cun l'Engiadina saja che Egnach saja ina vischnanca che creschia fitg spert, vizeversa as haja en las valladas periferas plitost il cuntrari.

Jau bandun l'Engiadina betg per adina. L'Engiadina vegn adina a restar mia patria ed ina part da mai.
Autur: Emil Müller nov president communal dad Egnach en Turgovia

RTR novitads 14:00

Artitgels legids il pli savens

Scrollar a sanestra Scrollar a dretga