Il manischunz da taxi ch'è mort avant bunamain duas emnas a Tavau Plaz n’è betg vegnì mazzà. Tenor l’examinaziun da la medischina forensica na dettia nagin connex cun in delict da mazzament. Sco la Südostschweiz scriva haja la procura publica confermà quai.
Ils dus umens che la polizia aveva arrestà en connex cun il mortori dal manischunz da taxi sajan puspè libers, haja la procura publica ditg vinavant.
I na dettia nagin connex tranter la dispita ch'ils dus umens han gì cun il taxist e sia mort.
