Sin la via principala tras il Partenz – la via naziunala N28 – datti regularmain colonnas pervia dal traffic turistic. Blera glieud vul ir a Claustra u Tavau per ir culs skis, e la saira turnan els puspè. Per guntgir da las colonnas emprovan blers automobilists da rivar sur vias lateralas pli spert tras la val – uschia er sin la via tras Schiers.
La fin d'emna passada ha la vischnanca da Schiers lura serrà la via tras il vitg. Quai per evitar colonnas tras il vitg e per garantir, ch'ambulanza e pumpiers pon passar senza problems. Las vias tras Schiers èn relativ stretgas. Sa cruschar è strusch pussibel, surtut sch'igl ha anc colonnas.
Acziun era illegal
La vischnanca na dastgia dentant betg serrar la via en atgna reschia. A quella conclusiun vegn l'Uffizi federal da vias e la Polizia chantunala suenter ch'els han studegià las leschas ed ordinaziuns. Sco che la pledadra da la Polizia chantunala, Anita Senti, ha ditg envers il schurnal regiunal da SRF, hajan ins admonì la vischnanca da Schiers.
En l'avegnir dastga Schiers per il mument be serrar l'access al center dal vitg, sch'i dat bler traffic. Quai pon els far cun sustegn da la Polizia chantunala. Il motiv è l'ospital en il vitg e las vias stretgas en il coc dal vitg.
«L'acziun ha valì la paina»
Sco quai ch'il president communal da Schiers, Ueli Thöny, ha ditg envers il Schurnal regiunal SRF haja l'acziun però valì la paina. Uss stoppia la Confederaziun agir. En vischnanca discuteschan ins schon davart ina varianta da laschar passar ils autos mo pau a pau tras il vitg.
